தில்லி ஜவாஹர்லால் நேரு பல்கலைக்கழகத்தில் தமிழ் இலக்கியவியல் எனும் தனித்துறை தொடங்கிட தமிழ்நாடு அரசு ரூ.5 கோடி நிதி வழங்கி உத்தரவிட்டுள்ளது.

இது தொடர்பாக தமிழக அரசு வெளியிட்டுள்ள அறிக்கையில், ஜவாஹர்லால் நேரு பல்கலைக்கழகத்தின் இந்திய மொழிகள் மையத்தில் தமிழ்ப் பிரிவு, இந்திப் பிரிவு, உருதுப் பிரிவு, இந்தி மொழியாக்கப் பிரிவு, கன்னட மொழி இருக்கை, ஒடிய மொழி இருக்கை, வங்க மொழி இருக்கை, ஆகிய அமைப்புகளைக் கொண்டு இயங்குகின்றது.

தமிழ் இலக்கியவியல் ஆய்வு, தமிழ் மற்றும் திராவிட மொழியியல் ஆய்வு, தமிழ் மற்றும் தென்னக வரலாற்றியல், சமூகவியல் ஆய்வு என மூவகையாக விரிவுப்படுத்தி ஜவாஹர்லால் நேரு பல்கலைக்கழகத்திலுள்ள தமிழ்ப் பிரிவு இனி, தமிழ் இலக்கியவியல் எனும் தனித்துறையாக தமிழ்நாடு அரசு முகிழ்த்து எழச் செய்துள்ளது . இதற்கென ரூபாய் 5 கோடி நிதி வழங்கிட ஆணையிடப்பட்டுள்ளது.

தனிப்பெரும் துறையாக உருவெடுக்கும் தமிழ் இலக்கியவியல் துறை வாயிலாக ஒப்பாய்வு, முதுகலை தமிழிலக்கியப் படிப்பு, வல்லுநர்வழி மொழியாக்கம், விருந்துநிலைப் பேராசிரியர்வழி ஆய்வுப் பெருந்திட்டம், முனைவர் பட்ட ஆய்வாளர்களுக்குப் புத்தாக்கப் பயிற்சி, தமிழாசிரியர்களுக்கு ஆய்வுப் பயிலரங்கம், அயலகப் பல்கலைக்கழகங்களுடன் ஒருங்கிணைந்து செயற்படுதல், தரமான நூல்களை வெளியிடுதல், ஜே என் யூ தமிழியல் எனும் பெயரில் 100 பக்க அளவில் ஆண்டுக்கு இருமுறை ஆய்வு இதழ் வெளியிடுதல் போன்ற பணிகள் மேற்கொள்ளப்படும் எனத் குறிப்பிடப்பட்டுள்ளது.

தஞ்சை தமிழ் பல்கலையில், ஐந்தாண்டு கால ஒருங்கிணைந்த தமிழ் எம்.ஏ., படிப்புகளுக்கு, விண்ணப்ப வினியோகம் துவங்கியுள்ளது.இந்த படிப்பில் பிளஸ் 2 தேர்ச்சி பெற்றோர் சேரலாம்.

இதில், இலக்கியம், கல்வெட்டியல், தொல்லியல், நாடகம் ஆகிய துறைகள் உள்ளன. அதேபோல, இரண்டாண்டு கால முது அறிவியல் டிப்ளமா படிப்புகளுக்கும் விண்ணப்பங்கள் வினியோகம் செய்யப்படுகின்றன.இந்த பிரிவில் இலக்கியம், சிற்பம், இசை, நாடகம், கடல்சார் வரலாறு, தொல்லியல், ஓலைச்சுவடி, அயல்நாட்டு தமிழ் கல்வி, மெய்யியல், மொழிபெயர்ப்பு, மூலிகை அறிவியல், பழங்குடி மக்கள் ஆய்வு உள்ளிட்ட துறை படிப்புகள் உள்ளன.

மேலும், முழுநேரம் மற்றும் பகுதி நேரமாக படிக்கும் வகையில், முதுநிலை டிப்ளமா படிப்புகளும் உள்ளன. இந்த படிப்புகளுக்கு உதவித் தொகை வழங்கப்படும்.இதற்கான விண்ணப்பங்களை, www.tamiluniversity.ac.in என்ற இணையதளத்தில் இருந்து பதிவிறக்கம் செய்து, 'பதிவாளர், தமிழ் பல்கலை கழகம், தஞ்சாவூர் -- 613 010' என்ற முகவரிக்கு விண்ணப்பிக்கலாம்

மேலும் தகவல்களுக்கு, 04362 - 227 089, 226 720 என்ற தொலைபேசி எண்களிலும், tuadmissionsection@gmail.com என்ற மின்னஞ்சல் முகவரியிலும் தொடர்பு கொள்ளலாம்.